Вялікабрытанія абвінавачвае Расею ва ўзломе 10 тысяч відэакамер для адсочваньня дапамогі Захаду Ўкраіне — Guardian

Спэцслужбы Вялікабрытаніі і яе саюзьнікаў абвінавацілі падразьдзяленьне расейскай разьведкі ГРУ, вядомае як APT 28 або Fancy Bear, у спробе атрымаць доступ да камэр назіраньня для маніторынгу заходняй дапамогі, якая паступае ва Ўкраіну, каб сарваць пастаўкі. Пра гэта паведамляе брытанскае выданьне The Guardian.

Пра гэта гаворыцца ў дакладзе, падрыхтаваным Нацыянальным цэнтрам кібэрбясьпекі Вялікабрытаніі пры ўдзеле агенцтваў з ЗША і эўрапейскіх краін.

Паволе дакладу, хакеры атрымалі доступ да прыватных камэр назіраньня, а таксама да камэр дарожнага руху, каб адсочваць пастаўкі ва Ўкраіну.

Усяго каля памежных пераходаў, вайсковых абʼектаў і чыгуначных станцый разьмешчана каля 10 тысяч камэр.

• 80% зламаных камэр працуюць ва Ўкраіне,
• 10% — у Румыніі,
• 4% — у Польшчы,
• 2,8% — у Вугоршчыне,
• 1,7% — у Славакіі.

Месцазнаходжаньне астатніх камэр не паведамляецца.

Што рабілі хакеры

• Зьбіралі інфармацыю пра расклад цягнікоў,
• шукалі транспартныя накладныя,
• рассылалі фішынгавыя электронныя лісты з парнаграфіяй і падробленымі дакумэнтамі,
• кралі паролі для доступу да сыстэмаў.

Нацыянальны цэнтар кібэрбясьпекі Вялікабрытаніі заклікаў кампаніі, якія дапамагаюць Украіне, «прыняць тэрміновыя ахоўныя меры».

Чым вядомыя хакеры з ГРУ

Хакерская група APT 28 або Fancy Bear таксама вядомая як 85-ы галоўны цэнтар спэцыяльных службаў ГРУ або падразьдзяленьне ГРУ 26165.

Паводле зьвестак амэрыканскіх уладаў, група, якая складаецца з кадравых афіцэраў расейскай ваеннай разьведкі, базуецца ў маскоўскай вайсковай частцы № 26165.

Хакераў Fancy Bear раней вінавацілі ва

• ўзломе сэрвэраў Нацыянальнага камітэту Дэмакратычнай партыі,
• электроннай пошты былога дзяржаўнага сакратара ЗША Гілары Клінтан,
• кібэратаках на Бундэстаг і Сацыял-дэмакратычную партыю Нямеччыны, Арганізацыю па забароне хімічнай зброі, а таксама іншыя заходнія інстытуты.

У 2020 годзе Эўрапейскі Зьвяз увёў санкцыі супраць начальніка ГРУ Ігара Касьцюкова і яго падначаленых з 85-га галоўнага цэнтра спэцыяльных службаў ГРУ.